قەزاو تەلەفوونێ وزە ئی شیعرێ!

فەرشید ڕۆستەمی

.

ئی وارانە ئشیێ ڕێزێرە سەروو ئی قاڵیێ

شەوەش دلێ گوڵەکاشنە خنیکنێ

تا ڕاس بلوو

من تا سەباحوو خودای

پەی ئەڕواحەکەو وێم      _مزانیم دە.. تۆ نیەنی!

فەرشیدم وڵاویان گڵوەو سیاوچەمانێوەنە

تۆ وەلێ عوسمانی مەگەر بە قیافە بژناسی

وەلێ عاشقی تەنیا بە زەنگێوە

عاشقەنی

بە ڕەنگێوە ( دەنگێوە)     _پووکاڵاوێت با موخابرات!

ئی لافاوە نزیکا

بەرۆ سیمەکاو برقی      میریچیڵەکا

بەش ڕێزیرە پۆسوو من جارێ

جامێ بدیەوتنە وەش           تاوێ؟    _فرەتەریچ..

بە ڕێزەو

سوجدە بەروو پەی ئەزەلی

کە ڕوخسارت تەمامیا بە لچتەو

بە لاملی ماچ نەکریاتەو

؛

    _دەی کە پاسەن.. بە وەشیمەو!

          مەگەر دنیا چننەش سەرا؟

ئازیز!

من ئەگەر تا ئیسە نەڕێزابوورە ڕەزاو تۆ

تۆ ڕازیەنی بە ڕزقوو ئی گرد وەرما؟

دیارا

تۆ ڕازیەنی

شانەت وێرگاکاو هامنینە

گۆزە ئاوی گێرۆ

سینەت ساوی و چیوی خرتش یاونابۆ

هەی تۆ وێت سەیە!

بدیە!

ڕاسەکێش واچوو

من ئشیێ چل ساڵێ چێوەڵ شاعر بیێنێ

پەشتەو شیشێو مینەبووسەکاو مەریوان_سنەی وە

یا بەرەو تویتاکانە

چەمەکێو تۆم کوێنێرە

باوڕ کەرە

من فەقەت گەرەکم بێ کەمتەر تەسادفێ کریا!

بازە ئیتر من

هەتا سەباحوو ئی خودای

سەروو قاڵیێوە

با نیشوورە

دیاروو دەنگێوە.. زەنگێوە.. نەڕێزوورە

هەر هیچ نەبۆ

عاشقی بە تەلەفوونێوە..     

_ئەلۆ!

ئازیزم ئامای ئای بێقەرار وێم

ئای ئای

شارژت هەن یا وێم گێرووتەو؟!