سەمای حەزێکی تاساو
سەرقەڵەمێک لەسەر کتێبی شێعری نەهەنگی ٥٢ هێرتز ی بەهار حسەینی
ساڵح سووزەنی
.
“ماڵی من، ژمارە سی و نۆیە
لەپێی دەکەم..
لەکوێ بمەوێ
خۆر رادەگرم گەرمم بکاتەوە“
نەهەنگی ٥٢ هێرتز، رەنگە ژنێ بێ کە بەدەم شەپۆلە بە هێرتز پێوراوەکانی جیهانی پاشمودێرن، جیهانی وێنە، موبایل و سەتەلایتی وانوێنراوەوە، باوەکوو بە درێژایی تەمەنی، “رقی لە هەموو جانتایەک بووە و لە شەمەنەفەر ترساوە “..هەموو ژیانی وەک جانتایەک بە دەستەوەیە٢٥ پڕ لە بیرەوەری؛ “ئەو هاوخوێنانەی کە کێوەکان خۆری خەونەکانیانی داوە بە کۆڵدا”٧ .. بیرەوەری”ئەو ملپێچەی لە جیهانی خوێنەوە” پێیانداوە و سەرەتا لای وایە کە؛ “پڕە لە هێزی شۆڕش” و دواتر لە ئاوێنەی ماشینەکانی کۆچ دا ئەبینێ کە پرش و بڵاو بۆتەوە و جادەکان ئەلێسێتەوە.. بۆیە ” مردووە مۆمیایی کراوەکانی نێو بازنە بچووکەکان/ خوازە/ جێ دەهێڵێ…
ژنێک کە دواتر ئەبینێ ” پەراسوەکانی هەر یەکە و بەدەم سەگێکەوەیە” / باجارێ وەک هێما لەو ژنە نەڕوانین/
بۆیە بەردەوام، ملی ئەم رێ بۆ ئەو رێ و ئەم قەتار بۆ ئەوی دی ئەگرێ و بە دوای گڕی ژیاندا “ماڵ دەکاتە ژمارەی پێڵاوەکانی تا؛ لە هەر کوێ خۆری بینی،لەشی سڕی پێ گەرم بکاتەوە/ باجارێ خۆریش وەک هێما نەبینین/
ژنێ کە هوتێلەکان بە دەمیەوە لەتر ئەدەن / ئەم مەست/… لە چوار لاوە بۆی رووت ئەبنەوە، هەڕەشەی لێئەکەن و تف لە ناسینی ئەکەن.. بەڵام ئەو لە نێوان ؛ باکوور، باشوور و رۆژ ئاوادا/ هێما/ رۆژهەڵاتێکی ئەوێ بۆ وەی خۆشی بوێ/ خوازە/ و بۆی بمرێ یان لەوێ بمرێ/ نوستالێژی/..
ژنێکی ماندوو کە هەست ئەکا “سێبەرێکی دەمانچە بەدەست /خوازە/ وەدووی کەوتووە و ئەم حەز ئەکا بەو دەمانچە تەقە لە تەنیایی و ماندووبوونەکانی بکا.. و لە ” فەست فوودەکانی شەقامە نامۆکاندا” خۆی ئەنووسێتەوە و دیسان تەنیایە.. فڕۆکەکان دێن و دەچن.. کەس و سەگێک.. سەگ و کەسێک / نەناس/ بەلایدا تێئەپەڕن و ئەم جگەرە لە لما ئەکێشێ/ هێما/ و هیچ روونادا.. ٩
ژنێک کە ئیتر ئەو لێوەسوورە ناناسێتەوە کە لە ئاوێنەکەدا/ هێما/ قاا قاا پێ ئەکەنی١٠ ..ژنێک کە خەمۆکی دایئەگرێ و بەیانی، نیوە ڕۆ و لە خەونی شەوانیشیدا، سەرقاڵی شۆردنی دەستەکانیەتی، بە کەف و سابوونی ئەو وڵاتە نوێیانەی کە بۆیان ئەچێ/ هێما/
ژنێک کە ئیتر ناتوانێ ئاشق بێ١٠ بۆ وەی هەموو دارەکان بۆنی سێوی گەنیو و زەریاکان بۆنی ماسی خنکاویان لێ دێ… ژنێک و پێڵاوەکانی کە ئەگەر لە سیمای قاڵاو و لە تاریکی تۆقێنەریشدا، خۆت بدەی بە “دیواری/ هێما/ سینگیدا” داناچڵەکێ/ ئەو پەڕی سڕی و بێهیوایی/١٤ و لایوایە کە ئیتر لە هیج گیایەکدا شین نابێتەوە/ هێما/..
ژنێکی ئێسک سووک کە، ئەگەر “پشتی قورس نەکا لە بن میچەکە ئەدرێ”/ هێمایەکی کوندرایی/ و لای وایە ژیان چوار پیتی زیندووە لە نێوان زاری ئێوە و دڵی ئێمە”دا ٢٦ .. ئەیەوێ بگەڕێتەوە.. بۆ وەی هەرگیز ئەوین نادۆزێتەوە ” ئەوەی لە سەر باڵی ئەوین نووسراوە درۆیە.. دووباڵی رەشی هەیە کە بۆنی گریان ئەدا و جانتا و تاریکی لایە” ٢٧ بەڵام ” فڕۆکەیەک ئەنیشێتەوە و کۆترێک خەڵتانی خوێن ئەبی/ هێما/ ١٦ ..
بۆ ماڵێک ئەگەرێ و بە هیوایە بیدۆزێتەوە/ هیما/ بەڵام ئەو سیزیۆفە و بەردەوام بەردە پرتەقاڵییەکەی/ هێما/ لێ بەر ئەبێتەوە” ئێمە سەرئەکەوین بۆ ئەوەی خلوور بینەوە” وەک مێژوویەکی تاڵ١٩
شارەکانیش کپن و سەر و خواریان بازنەیەکی رێک و خزن/ هێما/ دەکۆکێت و دەڕشێتەوە و لای وایە چرا کانیش جگەرە ئەکێشن٢٠
ژنێک کە … ئیتر خۆتان بیخوێننەوە …
.
نەهەنگی ٥٢ هێرتز، راستە زمانی گێڕانەوە بەسەریدا زاڵە و زمانێکی ژنانەی ئاسایی لە پشتە بەڵام ئەو زمانە پڕە لە وێنە، هێما و خوازەی شێعری شار و شەقامەسارد و سڕەکانی، شێعری غەریبی تاراوگە و ناموویی مرۆڤی سەردەم// شێعری ئەو شوێنانەی کە “پەنجەرەکانی بەستوویانە.. قەتار رائەکەن.. رێک بەسەر خەونێکتدا ئەڕۆن…. شێعرێ کە پشتی بە زمان بەستووە و ژیانی لا چوار پیتی زیندووە.. بۆیە هەموو وێستگەکانی بۆ ئەگەڕێ .. وتەنانەت شوێنێ بۆ نێژرانی چێژی بیرکردنەوە لە مردنیش نابینێتەوە..٣٥ بۆیە ئیتر لە دووی هیچ ئەگەڕێ.. مشتی دەکاتەوە/ هیما/ و بایەک دێت و دوورتر ئەبێتەوە ٣٧
داوا لە خوێنەرانی ئەو کۆ شێعرە ئەکەم؛ خوێندنەوەی من نەکەنە پێوەر.. بە بۆچوونی خۆتان هێما و خوازەی دەقەکان بکەنەوە و راڤەی کەن و چێژ – ئازاریی ئەو خوێندنەوە بکەنە ئەزموون..
” وتی قاوەکەت تاڵ بێ؟ وتم؛ تاڵ! ٣٩
بۆ کۆتایی کورتەشێعرێکی نێو ئەم کتێبە پێکەوە دەخوێنینەوە:
باران ئەبارێ،
بە ڕاکردن
خۆم دەگەیەنمە وێستگە
خۆرێکی تیژە،
بە ڕاکردن خۆم دەگەیەنمە وێستگە
کڕێوەیە،
بە ڕاکردن خۆم دەگەیەنمە وێستگە
ژیانی من پڕە لە وێستگە.
.
دەستخۆشی و بەردەوامی بۆ بەهار و هیوای دەرچوون لەو بازنە سڕانەی دێتە سەر رێی..
ژمارەکان سەردێری دەقەکانن.
نەهەنگی ٥٢ هێرتز دووهەمین بەرهەمی شێعریی بەهار حسەینی – یە که لە لە کۆتاییەکانی ساڵی ٢٠١٩ ی زایینیدا چاپ و بڵاو کراوەتەوە. (هاوچەرخ)