هەڵوەرینی پیتەکان – سۆران محەمەد / شێعر

سۆران محەمەد

.

رستەکان

ئامرازی پەیوەندییان

لە نێواندا نەما

سەرەتاو کۆتاییەکان تێکەڵاوبوون

وەکو چیرۆکێکی عەبەسی

پەناهەندەیەکی بێ ماڵ، بێ هاوڕێ

رەنگە یادت بێ فاڵچییەکە گوتی:

سەیری داهاتوو بکە

رۆژی بەختت سێشەممەیە!

شاعیرەکە گوتی:

بگەڕێرەوە بۆ رابردوو

ئەو شەوانەی  

بە حەپەی سەگەکان و 

دوکەڵی ئاگردانەکانا 

گوندەکانت دەدۆزییەوە

رەنگە لەوێ بەجێمابیت..

رستەکان لێکترازان

وەکو پارچەی کەشتیە نغرۆبووەکان

یان نیگا پچڕ پچڕە گوماناویەکانی پیرێژنەکان..

وشەکان لەتبوون

بۆ چەند دەنگێکی جودا:

ئەو سەدایەی

جارجار لە گۆشەی ژوورەکەوە

گۆرانییە خەمبارەکانی دەگوتەوە

نزم و نزمتر بووەوە

گۆڕدرا بە گریانێکی لەکوڵ و

فرمێسکەکان وشك بوونەوە..

وشەکان

پیتەکانیان هەڵوەرین

بە دوای زاراوەیەکی نوێدا دەگەڕێن بۆ ژیان

نوێتر

     راستر

           سادەتر بێ