ئەوین هەرمان

کاوە خوسرەوی

.

لە پێچ و پەنای چەپەڕێیەیل ژیان
هێزێگ دەسم گرێد
تا بێسەر و شوون نەچم،
تا هەڵەتەیل بێکەسی
لە خوەیانا گومم نەکەن.
ئەو هێزە ئەوینە
ئەوین پیرووز  پرشنگدارێگ
جوور خوەرهەڵات دڵنیایی
جوور تریفەی مانگەشەوەیل
بنار سەخت سەفەرەیل دۊر.
ئەوینێگ، ئاە .. ئەوینێگ
ک موور دڵداری لە سەر پەڕەی دڵم کوتاس
سوومای چەوەیلم وەرەو ئاسوو هەرمان
دڵنیاترەو کردێیە.
هێز ئەوینێگ
ک وێنەی تاڵ تاڵ گیس خوەر
خوەی پێچایە لە دەور دار بەرز زنگانی.
هێز و ئەوین،
دڵداری و زنگانی،
بێ باوش نیشتمانم
وردە لم بیاوانێگن
لە ناو گەردەلۊل سەرگەردانێگ
ک چەو سەوز ژیان
وەیلان شوون و هەتەریانە.