ئه‌فسه‌رى ياداشتنووس
دیار لەتیف
.
(تۆمارى شه‌وى يه‌كه‌م)
يادم نييه چه‌ند ڕۆژه له‌ناو ترسى زۆر، برسێتى و گومانى مانه‌وه‌دام، سڵێك وه‌ك مشار ده‌مبڕێت.
هاوڕێ هاوكۆلێژه‌كه‌م جارناجارێك پێمده‌ڵێته‌وه: تۆ ژينۆت بيره، تۆ شنۆت بيره، تۆ لانه‌ت بيره، كه‌مێك حه‌سره‌تبارتر ئاهێك له سييه‌كانى خڕده‌كات و دێته‌گۆ: هه‌موويانم له كتێبخانه‌ى گشتى گاوه. ئه‌و واده‌ڵێت و منيش قۆنداغه تفه‌نگێكى تێوه ده‌سره‌وتێنم و به‌چرپه‌وه: كه‌رباب تۆ چيته! ئه‌و تارمايانه نابينيت؟ گه‌مارۆدراوين، له حامورابى و په‌رژينى زانكۆتبم، ئێستا نا كه‌مێكتر وه‌ك چۆله‌كه ده‌خرێينه قه‌فه‌سه‌وه. ئه‌وشه‌وه هێزى پشتيوانى فريامان نه‌كه‌وتبا، زه‌حمه‌تبوو نه‌بووينايه‌ته ميوانى باره‌گاى خه‌ليفه. كتوپڕ ته‌قه ده‌ستپێده‌كات، فيشه‌ك وه‌ك دابارينى دڵۆپى باران داده‌بارێته سه‌رمان. يه‌كه‌مجارمه چه‌ك بگرمه ده‌ست، بچمه شه‌ڕگه. من شه‌وان خۆف ده‌كه‌م و ناوێرم بڕۆمه سه‌راو، كه‌چى وا ڕيزێك شانه‌فيشه‌كم لێئاڵاوه، لۆگۆيه‌ك له‌سه‌ر جله‌كه‌مه و لێى نوسراوه: پاسه‌وانى سنوور..
تاق تريق، گڕدار به‌ر ديوارى مه‌ته‌رێزه‌كه‌مان ده‌كه‌وێت و نارنجۆكمان تێده‌هاوێژرێت.
ڕه‌نگه ئه‌هريمه‌نه‌كانى تاريكى، ئه‌م هونه‌رى ڕووبه‌ڕووبوونه‌وه‌‌يان له له‌شكركێشى سوپاى نازييه‌كان بۆ سه‌ر شارى لينينگراده‌وه وه‌رگرتبێت. پێنج خوله‌كى سه‌ره‌تا، (چۆكم – قۆڵم، په‌نجه‌كان و ملم) سڕببوون. خۆچه‌وركردن به‌گريسى نه‌به‌زيى چه‌نده باشه، به‌ڵام مه‌ترسيدار. ئه‌ندێشه‌م فه‌له‌ج، ترس قوڕگى وشككردووم، شاخێك له‌سه‌ر كۆڵمه. ده‌له‌رزم، به‌دزييه‌وه ليترێك فرمێسك ده‌ڕێژم، هه‌زار بيرى ناخۆش به‌مێشكمدا ده‌فڕێت. پێويسته هه‌ستمه‌وه و وه‌ك گايه‌كى شێت، شانه‌يه‌ك گوولله بته‌قێنمه سوچى ئه‌وبه‌ر، هه‌رواشده‌كه‌م، ده‌نگى ته‌كبير به‌رزده‌بێته‌وه. هاوڕێكه‌م ڕاده‌په‌ڕێ به‌رگرى بكات، گوێم لێيه ده‌ڵێت: گوو به چاره‌نووس، ڕۆژى ئه‌و كه‌سانه تووشى شێرپه‌نجه بێت وا ئێستايان خوڵقاند، من و ئه‌م دۆخه ڕه‌قه‌يان نه‌وتووه. ويستى ده‌ستڕێژێك بكات، به‌ڵام به‌پشتدا كه‌وت، كه چوومه سه‌رى بينيم فيشه‌كێك چه‌قيوه‌ته سينگى، ده‌يكرخاند و هه‌ناسه‌كانى كۆتايى ده‌دا، ئه‌مه‌يوت: نه‌ده‌بوو لێره‌باين!
وايوت و سه‌رى له‌ناو ده‌ستمدا لاربوويه‌وه. وه‌ك ئه‌وه‌ى ليمۆ ده‌پرژێننه چاومه‌وه، فرمێسكم كه‌وته سه‌ر ڕوومه‌تى و ماچى ناوچاوانيمكرد. پڕمدايه كڵاشينكۆفه‌كه‌م، ڕێژنه‌م له‌جه‌مسه‌رى به‌رامبه‌رمكرد، قيڕاندم، جنێوم به‌م شه‌وه نه‌فره‌تييه ده‌دا و كوفرم به‌ژيان ده‌كرد. ڕۆژهه‌ڵهات و خۆمان كۆكرده‌وه، به‌چڕى هێرشمانكرد، كه‌نارمان بڕى و خزاينه ناو شاره زه‌رده‌واڵه‌يه‌كى نوستووه‌وه، شه‌مشه‌مه‌كوێره‌كان شكان..
شه‌مشه‌مه‌كوێره ئه‌و چه‌مكه‌يه، ميدياى حيزبى هێزه‌كه‌مان به‌كارى ده‌هێنا.
چووينه شاره‌وه باران ده‌بارى، هه‌مه‌ڕه‌كان پێشڕه‌ومان بوون، سوپايه‌كى قوڕاوى و تاسه‌ى چه‌ند خوله‌كێك خه‌وبووين.
(تۆمارى ڕۆژى يه‌كه‌م)
سه‌كۆى له‌گوڵ هه‌ڵچنراو، بڵندگۆ، چاودێريى پاسه‌وانه چاكه‌ت له‌به‌ره‌كان. سه‌رۆكى له‌نده‌هۆر وتارى گه‌رمى نيشتمانى ده‌خوێنێته‌وه، چه‌پڵه كه‌شوهه‌وا خۆره‌تاو ده‌كات. له‌نده‌هۆرى سورفل، ده‌مكه‌فاوى، په‌نجه‌ڕاوه‌شێنراو، ورژاوه و ده‌شيڕێنێت: ئاگرمان له‌چياوه هێنايه‌خوار. سه‌رۆك هه‌رخۆى فه‌رمانده‌ى گشتى هێزه چه‌كداره‌كانه، تاوه‌كو شه‌ڕ كۆتايى نه‌هات له‌ده‌ره‌وه‌ى وڵات نه‌گه‌ڕايه‌وه.
پێناچێت خوله‌كێك گه‌رمايى چه‌شتبێت، هه‌رگيز ڕێكنه‌كه‌وتووه له‌پێشه‌وه‌ى جێبێكى سه‌ربازييه‌وه ببينرێت، ته‌نانه‌ت نازانێت نه‌خشه بۆ ڕزگاركردنى بستێك زه‌وى داگيركراو بكێشێت. ناوى جۆرى چه‌كه‌كانى پێ له‌يه‌كتر جياناكرێته‌وه، سه‌رۆك به‌مدوايانه ده‌ستى داوه‌ته چيرۆكنووسين!
ده‌وترێت نووسه‌ره ده‌رباره‌كانى پشوويان نه‌ماوه، شه‌و گرێى ڕۆژ ده‌ده‌ن و ڕۆژ گرێى شه‌و، ته‌نيا خه‌ريكى نووسينه‌وه‌ى پاڵه‌وانييه‌كانى سه‌رۆكن، ته‌نانه‌ت سه‌رۆك نه خاڵبه‌ندى و نه ڕێنووسی تەواو نیە. له لاپه‌ڕه‌ى سه‌ره‌تادا وێنه‌ى سه‌رۆك به‌دووربينێكه‌وه هاتووه و له‌سه‌ر ته‌پۆڵكه‌يه‌كه و به‌پێى مه‌غزاى وێنه‌كه بێت، له‌سه‌نگه‌رى نه‌يار ده‌ڕوانێت، به‌ڵام سه‌رۆك بيريچووه قه‌پاغى دووربينه‌كه لابه‌رێت!
سه‌رۆك ته‌نانه‌ت بيرى نه‌ماوه چه‌ند ساڵه سه‌رۆكى وڵاته!
…
گوێم زامداره به‌لێدوانه‌كان، له‌وديوى شاشه‌كان وه‌ك شانازييه‌ك به‌سكێكى تێره‌وه به‌هاى ده‌سكه‌وته ڕه‌مزييه‌كانيان ده‌گێڕايه‌وه. شه‌ڕوانان به‌برسێتى و فيشه‌كى خۆمانه‌وه به‌رگريمان ده‌كرد. ئه‌و پاڵپشتييه ته‌قه‌مه‌نييه‌ى هاوپه‌يمانان ده‌ياننارد، به‌رپرسه باڵاكان ده‌يانلووشييه‌وه.
له‌پشت هه‌ڵشاخانى ديموكراتى و تيۆكراتييه‌وه، دێوێكى برسى هه‌ڵپه‌رست ئاماده‌يه:سه‌رمايه‌دارى!
فه‌رمانده‌كان خه‌ريك مێگه‌ل دزينبوون، پايه‌دارى ليواكان شه‌وان له‌به‌ره‌ى دوا‌وه‌ى ناوچه ئازادكراوه‌كان، دوورتر له دوور، له دوورى ئێمه‌وه مێزيان ده‌ڕازانده‌وه، ده‌يانخوارده‌وه و باسيان له ڕاوه‌ڕووتى مانگا و كه‌لوپه‌له‌كان ده‌كرد. له‌ناو ئه‌م ناراسته‌قينانه خه‌ريكه ونده‌بم!
سه‌ما خاتوون، يه‌ك له‌و ژنه مۆدپه‌رست و بزێوانه‌ى بارۆنێكى سه‌ربازى، بۆ كچه دۆسته‌كه‌مى گێڕابوويه‌وه: قوزمان ته‌ڕه به بۆن، هێنده بۆنى كێوێتى كێرى پاسه‌وانه‌كانمان هه‌ڵمژى.
وتبووى: ژنانى ده‌سه‌ڵاتداره سياسى و سوپاييه‌كان، به‌ده‌ست سيسى ئه‌ندامى نێرينه‌ى مێرده‌كانيانه‌وه داماون، شه‌رمى له گێڕانه‌وه‌ى ئه‌وه‌ش نه‌كردبوو، چه‌نده پشتبه‌ستوون به‌دۆسته كوڕه‌كانيان.
ده‌يوت: وانه‌با، مه‌گه‌ر هه‌ر به‌و لاستيكه ده‌ستكرده خۆمان ڕه‌حه‌تكردبا، ده‌نا په‌لامارى پياوانمان له‌سه‌ر شه‌قامه‌كان ده‌دا. باسيكردبوو: فه‌رمانده‌كان ئه‌وده‌مه‌ى جوتده‌بوون، بۆ ڕه‌پى چووكيان، حه‌پ و په‌نجه به‌كۆم خشاندنيان ده‌ويست. جارێكيتر گوتبووى: كاتى سه‌رجێيم له‌گه‌ڵ دۆسته‌كه‌م، هه‌ميشه داواده‌كه‌م تۆره‌مه‌كه‌ى بپژێنێته سه‌ر ڕووخسارم. به‌ته‌نزه‌وه ده‌يوت: تۆره‌مه ڕووخسار شۆخ ده‌كات!
به‌روارى (8|3) ئاوديوى شاره‌كه بووين، بۆمبه چێنراوه‌كان له چه‌ندين شوێن حه‌شاردرابوون، ده‌بوو هۆشداربين. دابه‌شبووينه سه‌ر گه‌ڕه‌كه‌كان، كه‌وتينه ماڵ پشكنين، هه‌ر تيپێك ئه‌ركى گه‌ڕانى كۆڵانێكمان به‌سه‌ردرا، كێشه‌مان هه‌ڵكوتانه سه‌ر خانووه‌كان و تێپه‌ڕين بوو به‌ره‌و ژوور.
جگه‌له مينه قوڕميشكراوه‌كان، خه‌نده‌ق و مه‌ڵاسى خۆكوژه‌كان له‌مپه‌رى خاوێنكردنه‌وه‌ى ناوچه‌كه‌بوون.
جه‌نگ په‌يڤه‌كانى ناو دڵى كردمه به‌رد، خه‌ونه ڕه‌نگاڵه‌كانم تاريك داهات، به‌ڵام ته‌قينه‌وه‌ى ماشێنه بۆمبڕێژه‌كان، هه‌ڵوه‌رينى براده‌رانم وه‌ك گه‌ڵاى پايز، فيكه‌ى خومپاره نادياره‌كان، په‌لامارى شه‌وانى ته‌م، چاڵيان له ده‌روونم هه‌ڵكه‌ند. له‌گه‌ڵ په‌يدابوونى مرۆڤ له‌سه‌ر زه‌وى، جه‌نگ دێت و ژه‌هر ده‌ڕژێنێته به‌رگه هه‌واوه. جه‌نگ هات و زۆر شتى لێبردين، زياتر له قاچێ، زياتر له خه‌ونێ، زياتر له دڵێ.
خۆشييه‌كانى لێساندين، ساده‌ييمانى كرتاند، كه‌پوومان قاندرا به بارووت، دێوه‌كانى ناخمانى له‌خه‌و هه‌ستاند، شنه‌باى گۆڕييه ڕه‌شه‌با، ماڵه‌كانى ڕاماڵى و پۆل پۆل خێمه‌ى دابه‌خشاند.
كه جه‌نگ ته‌واوبوو، باڵه‌خانه‌كان داڕێژرانه‌وه، جاده‌كان وه‌ك فه‌رش ڕاخرانه‌وه، باخچه‌كان پشكووتن، نه‌خۆشخانه، په‌رستگا، قوتابخانه‌كان بنياتنرانه‌وه، ئه‌وه‌ى سارێژنه‌بوو برينى دڵه‌كانه. گوڵاڵه‌سوره‌كان يادگارى جه‌نگن، جه‌نگ سترانى سه‌رلێوه‌كانى خامۆشكردين، دڵته‌نگيى ڕاكێشايه سه‌ر خوانى ماڵه‌كان، كۆترى خه‌نده‌كانى هه‌ڵفڕاندين. هه‌رگيز تێپه‌ڕينى ڕۆژه‌كان قه‌ره‌بووى ناشتنى پاشماوه‌ى ئازاره‌كان ناكه‌نه‌وه، جه‌نگ برينى خسته پێستى ناسنامه‌كانمانه‌وه.
فرمێسكم بۆ ئه‌وه‌يه توڕه‌يى لووله‌ى تفه‌نگه‌كان ناهێڵن بير له خۆشه‌ويسته‌كه‌م بكه‌مه‌وه، نابێت بكوژرێم له خه‌ياڵى كه‌سێكدام، كه‌سێك له خه‌ياڵمدايه. حه‌زمده‌كرد باڵبگرم و بفڕمه باوه‌شت، تاكه سه‌نگه‌رى ئاراميم تۆيت، يادت ده‌كه‌م و ده‌خوازم وێنه‌ت له‌هه‌وادا بكێشم، ده‌مه‌وێ له‌گه‌ڵت بژيم و له‌گه‌ڵت بمرم، له‌گه‌ڵت زيندووببمه‌وه و له‌گه‌ڵت بژێمه‌وه. بيرى پێكه‌نين، گاڵته‌وگه‌پ، دواندنه هه‌نگوينييه‌كانت ده‌كه‌م، بيركردنه‌وه له‌تۆ هه‌واى پاكى گونده. ده‌چمه خه‌ياڵه‌وه و ده‌ستت ده‌گرم، ده‌ڕۆين، ده‌ڕۆين و ده‌ڕۆين، دوورتر له‌شاره دڵڕه‌قه‌كان لاده‌ده‌ين. پرچت به‌ستووه، ملوانكه‌يه‌كى مقێم به‌ردينت له‌مله، منى تاريكى پۆشيو، ناڵه‌يه‌ك ده‌مته‌كێنێ و له ناشوێنه‌وه بازمده‌داته ناوكات. ستايشى خه‌ياڵ ده‌كه‌م، باشترين هه‌له بۆ گه‌يشتن به‌تۆ!
…
(تۆمارى شه‌و و ڕۆژه‌كان)
نوسينه‌وه‌ى ڕۆژياده‌كان، كودەتايه به‌سه‌ر تاڵى ناو كات. هه‌ينييه‌كى سپيمان گوزه‌راند، لووله‌ى تفه‌نگه‌كان كپ داهاتن، پشووى ناو جه‌نگ وه‌ك پێكه‌وه خه‌وتنى دووژمنه‌كه‌ته له ژوورێكدا. هه‌ڵكه‌وتى كوشتنى ڕاسته‌وخۆم هاتووه‌ته به‌رده‌م و ته‌قه‌م نه‌كردووه، من پياوكوژنيم، له‌پێناو خۆپاراستنمدا به‌رگريم هه‌بووه. پێموانييه مرۆڤ گوێى بۆ مۆسيقا گرت و گريا، بتوانێت ببێته بكوژ، ده‌ستى بچێته خوێن. جه‌نگ وايلێمانكرد په‌نا ببه‌ينه‌به‌ر فريادڕه‌س، زۆربه‌مان كه باوه‌ڕداريش نه‌بوون، په‌لاماره كوشنده‌كان ناچاريكردن باڵى ئيمانيان لێبڕوێت. جه‌نگ واده‌كات بازاڕى ئاسمان گه‌رم، ڕه‌واجى فه‌له‌ك له جاران زياتر بێت. هه‌شمانبوو نه‌يده‌ويست له تووتنى ئاين بكێشێت، ڕوويده‌كرده گه‌ڵاخونچه‌ى ليريك.
هانده‌كه‌م كارپێده‌كه‌م، گۆرانييه‌كى ئه‌زنه‌فۆرى ده‌خه‌مه‌سه‌ر، مژووڵتر له جاران، يادنووسييه‌كه‌م سه‌رشار ده‌كه‌م له گرته‌ى دووكه‌ڵى گرمه‌كان.
حه‌زمده‌كرد باخه‌وانبام و گوڵه‌كانم ئاودابايه، حه‌زمده‌كرد شاعيربام و چامه‌م بۆ به‌فر نوسيبا، حه‌زمده‌كرد بۆقبام بچمه زۆنگاوێكه‌وه، تاوه‌كو جه‌نگ كۆتايى ده‌هات نه‌هاتبامه وشكانيى. چيده‌بوو پاكه‌وانبام و پۆخڵه‌واته‌كانى شارم خاوێنكردبايه‌ته‌وه، نه‌ك پاڵه‌وان. له‌ڕاستيدا به‌خۆمبێت هه‌رنه‌بام، نه‌بوون ته‌ندرووستتره. هه‌بوون ئاژاوه‌ييه، گێره‌شێوێنييه، جۆرێكه له وێرانكارى..
شه‌و به‌هێواشى خۆى ده‌كشێنێته چاوه‌كان، ده‌نگى سه‌گوه‌ڕ له دووره‌وه دێت، ماوه‌يه‌كه چێژ له ڕۆژئاوابوون نابينم، ڕيالييانه په‌سنى تاريكى ده‌كه‌م. بۆنى فێنكى داره‌كان و زيكه‌زيكى زيكزيكه‌كان خه‌ياڵم به‌ره‌و شوێنگه‌لێك پێش ده‌ده‌ن و هه‌ست به نائارامى ده‌كه‌م. شه‌وى شاره‌كان ژياندۆستانه نييه، ده‌مترسێنن وه‌ك شه‌وڕه‌ويى. سه‌ربازه خوێنه‌ره‌كه گووتى: كه مردم لانيكه‌م نامه‌وێ له شه‌ودا بمرم، شه‌و دڵته‌نگكه‌ره، هێمنييه‌كه‌ى ده‌مخنكێنێت. له خۆڵ ده‌ترسم، خۆڵ بووه‌ته دێوه‌زمه‌م، ته‌لدڕكه و ناوه‌وه‌م ده‌بڕێت، مردن له شه‌ودا له‌رزهێنه‌ره، ته‌ز ده‌خاته له‌شه‌وه. (شه‌ومردن) ئازاربه‌خشه، وه‌ك هه‌ڵدانته بۆ ناو هه‌ڵدێرى پڕ مار و دووپشك. شه‌و هه‌يه ڕۆشنه و ڕۆژيش هه‌يه تاريكه، شه‌و عه‌مباره‌پۆى ڕازه‌كانه، دڕكى ئه‌فسانه‌كان گۆشتى هزرى گه‌نانوين. هه‌روه‌ها گوتبووى: كاتێك چيرۆكه‌كانى عه‌لى ئه‌شره‌ف ده‌روێشيان ده‌خوێنمه‌وه، حه‌زده‌كه‌م خواردنه‌كه‌م له‌گه‌ڵ مێرووله‌كان به‌شبكه‌م!
شه‌وێك له ساترێكى خۆڵى پشتێنه‌ى شار، ئێشكگره و له‌وكاته‌دا ڕووداوى مه‌رگه‌ساتى ڕۆمانێكى يادهاتبوو. دڵبرين، ته‌نانه‌ت گرياشبوو، ده‌ست به‌گيرفانى جوعبه‌كه‌يدا ده‌كات و جگه‌ره‌يه‌ك داده‌گيرسێنێت. نيشانه‌شكێنه‌كه بڵاچه‌كه‌ى بينيبوو، فيشه‌كێك هه‌نارده‌ى سه‌ره خه‌فه‌تاوييه‌كه‌ى ده‌كات، نيشانگره‌وه‌كان سه‌للاخى ته‌مه‌نن. وه‌ك ده‌گێڕنه‌وه: جگه‌ره‌كێشێكى باش نه‌بووه. وتراويشه: هه‌ر ئه‌م شه‌ڕه خۆفناكه فێرى كێشانى دووكه‌ڵى كردووه. من، كه ڕۆژه‌كان تۆمارده‌كه‌م، ده‌زانم جگه‌ره‌كێشان له جه‌نگدا له‌زه‌تى ساتى تۆره‌مه ڕژاندنى هه‌يه، سه‌خته له جه‌نگدابيت و جگه‌ره‌كێش نه‌بيت، مه‌گه‌ر نينۆكه‌كانت بكڕۆژيت، خه‌ريك چه‌وركردنى فيشه‌كدان و بونيادى تفه‌نگه‌كه‌ت بيت، ئه‌گينا نيگه‌رانى ده‌تپليشێنێته‌وه.
سان له‌خه‌ونه‌كانيدا ده‌يبڵماند، مۆته‌كه ده‌يگرت و شه‌ڵاڵ له ئاره‌ق، جارێك بۆيگێڕامه‌وه: له هه‌موو خه‌وه‌كانمدا ده‌كوژرێم. گاهێك له‌كافێيه‌ك دانيشتووم، كتوپڕ خۆكوژێك خۆى ده‌كاته ژووردا و ده‌ته‌قێته‌وه. شه‌وێك له خه‌ونمدا ده‌پرخێنم، مشكێك ده‌چێته گه‌روومه‌وه و هه‌ناسه‌م ده‌شه‌ختێ! خه‌ونێكتر، كه‌وتوومه‌ته ناوچه‌ى قه‌ده‌غه‌وه و پێم له‌سه‌ر مينێكه، بايه‌كى به‌هێز هه‌ڵده‌كات و
داڵه‌كه‌رخۆره‌كان و كه‌متياره‌كان له ده‌ورووبه‌رم ده‌سوڕێنه‌وه. هه‌رجاره خه‌ونێك و جۆرێك كوشتن، شێوه‌يه‌ك له مه‌رگ. كه‌چى سان له بێداريدا ته‌نانه‌ت دووجار كه‌وتووه‌ته بۆسه‌وه و ده‌ربازيبووه، ڕووبه‌ڕوو به‌پێوه جه‌نگيوه، نه‌بووه فيشه‌كێك هه‌ڵيبته‌كێنێت. پێمووت: گه‌نجۆ تۆ به‌دواى گولله‌ى خۆته‌وه‌يت.
كێ گووتى باوكم ده‌كوژم؟! له‌ڕاستيدا لێيخۆشنابم، ئه‌و هانيدام ببمه ئه‌فسه‌ر، خه‌ونى من نواندنه.
ته‌قه له‌و ڕۆژه ده‌كه‌م، كه تێيدا له‌دايكبووم. كه‌وتمه ئه‌ڤينى ژنى ناو وێنه‌كانى باوكمه‌وه،
چه‌ندجاربووه ئه‌لبوومه‌كه‌يم هه‌ڵداوه‌ته‌وه و دڵداريم له‌گه‌ڵ ژنه دۆسته‌كانى كردووه، ده‌ستم له مه‌مكيانداوه. باوكم پياوێكى جوانه، به‌ڵام زۆڵيشه.
باوكم گوناحه داماوه به‌ده‌ست دايكمه‌وه، دايكم گوناحه داماوه به‌ده‌ست باوكمه‌وه.
باوكم چووه ته‌مه‌نه‌وه و په‌ڵپه‌كانى ڕه‌وينه‌وه، وه‌ختايه‌ك هێنده‌ى تيمساحێك په‌ڕيوه!
باوكه، نه‌فره‌تێكت خسته زێماڵى دايكمه‌وه و منت لێ خوڵقاند، پوشى ڕه‌نجت ده‌بينم، هه‌رگيز نه‌مويستووه شه‌مچه‌ى لێبده‌م، ئاخۆ بينيومت چۆن هاڕاوم له‌ناو ده‌ستاڕى ئه‌مڕۆژانه‌م، خوودى ژيان له‌گۆڕه‌پانى جه‌نگ ترسناكتره.
كۆمه‌ڵێ گه‌نجى خه‌ونڕه‌نگينين له‌به‌ر بژێوى داڵده‌مان هێناوه‌ته سه‌ربازگه‌كان، مه‌شقمان پێده‌كه‌ن. ده‌خرێينه پشت ئه‌ڤيكۆ و ده‌ڕۆين، ده‌برێينه سه‌نگه‌ره‌كان، ده‌زانين زه‌حمه‌ته جارێكيتر بگه‌ڕێينه‌وه.
له ڕاستيدا نامانه‌وێ ژيان خراپتر بكه‌ين، خه‌ون به‌وه‌وه ده‌بينين توێريزه‌ى ئاشتى بكه‌ين، به‌ڵام جه‌نگ شتێكيتره، بووينه برين و له‌فاف. گێڕانه‌وه‌ى ئه‌و خووله‌كانه وه‌ك ڕێكردنه به‌پێخاوسى به‌سه‌ر جاده‌ى بزمارڕێژكراودا. خه‌ونه‌كانمان دۆڕا، فرمێسكه‌كان تێكه‌ڵى خۆڵبوون، وه‌ك په‌ڕ له‌ناو چنگى بادا خولاوينه‌وه، ئومێدبه‌خشين به‌هانه‌يه‌كبوو بۆ مانه‌وه.
له چاوه‌ڕوانى مه‌رگ مێش ده‌كوژين، به‌رده‌وام ده‌ميزين، كاوێژ ده‌كه‌ين، چيرۆكه فۆلكلۆرييه‌كان ده‌گێڕينه‌وه. چاوه‌ڕوانى چركه‌ساتى چاره‌نووسين. له‌ناو مۆڵگه‌كانى خۆمانين له‌پڕ ده‌نگێكى هه‌ژێن دێت، له پێداكێشانى ئاسمان و زه‌وى ده‌چێت. زرم، ده‌نگێكى خوێناوى، ڕمانى ديواره‌كان و ته‌پوتۆز، دارووپه‌ردووى زۆر، هاوارى برينداران و فه‌رمانى پاشه‌كشه.
بۆ چه‌ند خووله‌كێكى كه‌م هه‌ستم به‌ساردى سڕێتى ڕانمكرد، برينه‌كه‌م سووكبوو، هێرشێكى دڕندانه كرايه سه‌رمان. به‌شێكى زۆرى هێزه‌كه‌مان له چۆڵكردنه‌وه‌ى پێگه‌كاندابوون، ديلبوون نه‌بوو، گيراباين، گوڵـلەباران دەكراين. له‌گه‌ڵ گه‌ڕانه‌وه‌مان به‌رگرييه‌كى شه‌رمنانه‌ى خۆپارێزانه‌مان ده‌كرد، ورده ورده كشاينه‌وه بنكه‌كانى پێشوومان. سه‌روه‌ختى جه‌نگ خۆشه‌ويسته‌كه‌م وڵاتى جێهێشتبوو. ئەوكات زانيم، كه بۆ پشووه‌كه‌م گه‌رِامەوە. ئيَستا له‌سه‌ر سنورم، چه‌ند ڕۆژێكه په‌تاته‌ى كوڵيو و جگه‌ره‌ى فه‌ل، ده‌خۆم و ده‌كێشم.
دواى داگرتنى ئه‌ستێره سه‌ربازييه‌كه‌ى سه‌رشانم، له‌شم سووكتر بووه‌ته‌وه. خه‌وه‌كانم ته‌ندرووست و نا ئارامييه‌كانم جێگيرتره.