سێ کورتەشێعری زانیار موحەمدی نێکوو / لاونووس
زانیار موحەمەدی نێکوو
.
هیوا… .
نە بە کێرد ئەمرم
نە بە چەک
نە سێدارە کارم تێ دەکا
لە خۆوە بەوانە مەمکوژن
بۆ کوشتنی من
تەنیا هیوام لێ بستێنن
و هیچی تر.
.
ئەوینی قەدەخە( سۆرانی)…
دەکرێ لەناو هۆنراوەیێکدا
خۆ بکەمە مەم
یان لەناو چیرۆکێکی درێژدا
تۆ ببیتە خەزاڵ
بەڵام دنیای نووسراوەکان
سەرانسەر نەگەیشتن و دابڕانە
بەقسەی من دەکەی
دەستت بخە نێو دەستم
وەرە با دووبەدوو لەم شێعرە هەڵێین.
.
مەڕۆ
ئەگەر تۆ بڕۆی
هەست ئەکەم
پاشماوەی خۆشەویستییەکی کۆنم
ئیدی بەکاری هیچ نایەم
هەر وەک لادیوارێکی کۆن
کە درز ئەکەوێتە سەر جەستەی
ئیدی بەکاری هیچ نایە
تەنیا ڕووخان نەبی.