دوو غەزەڵی نوێخوازانە

عەبدوڵا گوڵابی (هۆنەر)

وشەیێ بێژە

.

وشەیێ بێژە فڕیناوی، شتێ هەستێکی
کافەیی‌تر لە سکووتێکی بەرەو تاریکی
بە نیگاهێکی بە ئیماژەوە ئەستێرە و ژن ــ
پەمەیی‌ بفڕێ بە رەقسی قەڵەمی ماژیکی
گوڵەهزرینە بە بارانی پیانۆیی بگەن ــ
بە یەک …. و … نۆتی فیکر بڕژێ لە ژێی مووزیکی
وە لە تەنیایی بەرەو کیژ بچێ، ئیوارەی ــ
شاعیرێکی گڕی وۆدکا بە گڕووی نیزیکی
ماسییەک رووحی لە سەر سینکی زەرفشوویی بوو
خانمێکی بەپەلە و چەن کەرەسەی فیزیکی ــ
تابڵۆیەک لە خەمۆکی بوو؛ بە ساعەتدا چووی
پڕ بە باوێشکی کتێبێ کە ڕژابوو لیکی…….
وەرە دایرێکتیترین بیانوو لە رزگاریمان
وە غەزەل خوازەیەکی زیندوو، ئەگەر یاریمان ــ
بدەن و بەرهەمی رۆژانە بکەن لایک و کاــ
مێنت ..وە / شتێ بوو کە بە شەوگارەوە هەڵدەپرووکاــ
مانگ؛ ئەی مانگ من و تۆ و غەزەل و گۆرانی
وە پەشۆکاوی لە نێو نیوەشەوی قەیرانی ــ
کۆمەڵ و ئاو و هەوا و ژینگە هەتا ئابووری
بە گەلێ عاشقی کۆچ‌کردوو بە فیبری نووری
وشەیێ بێژە لە خەوگاری چیا پیرۆزی ــ
ڕاچەنێ و نیچە بوو پێموایە کە قۆزی و قۆزی
خوێنی دەتکا لە سمێڵانی وە سالۆمە گڕی
گرتبوو نیچە بە واگنێرەوە بوو… هەڵدەفڕی…

…

غەزەلزا

.
نیگاکانم لە سەر ئەو گووشییەم داچاندووە حەوتوو
ــ یەکی پڕ پڕ لە حەسرەت بوو پڕاوپڕ یادت و جەوت و…
غەزەل ئەژنۆشکاو/ ئاوێنە چڕژن/ شەو قەسیدەی کۆۆۆۆچ
کچێ بۆچت لە من واکرد و دەشزانی ئەرێ!!! کەوتوو
م و زەحمەت تازە پێ هەڵدەسمە و بەو حەجمەوەم ئاوا
ــ تەخوازی باوەشت، عەترت، تەڕایی داغی پێخەوت و
لەشی شلکت، لەشی لانەی مەلانی لانەوازی سووک
کە هەڵدفڕن لە سەر سەرت و دەنیشن‌هەڵ بە دەم سەوت و
چریکە و… ئاە ئەی ژن، ئەی خیاڵی خوا لە شێعرێکی
تەڕا تەنراو، بە واژۆی شاعیرێکی ساتێ نەسەرەتوو

رفیق و ناسیاو و دوور و نیزیکم لە بەر دەرکێ
دەدەن ئاپۆرە، گۆیا من نەخۆشێکم بەرەو مەوت و
دەڵێم چی!؟ دەمهەوێ دیزاینی نێو ماڵم بە تەرحی چا
ــ وەروانی هەڵچنم چاوم لە ڕێگا… بەڵکوو هەڵکەوت و
سەرت لێدام ئەدی ئیتر سەرێ هەڵدێنم و چاوم
ئەوەش پیکێ…( بە خۆشی چاوەکانت شاژنی خەوتوو)

تەواوی شێعرەکانم با، تەواوی هەستەکانم ئاو
سەرم باران و باران و خەوم بەو حاڵە لێکەوت و
لە خەوما هەر چی دەریا بوو بە باوەش تۆوە بوو من بوو
م و من ون بووم و تۆ تاوێ بە ڕووناکی وەدەرکەوتوو
کە خۆ نابینمەوە و دەڕشێتەوە شار و تەواوی کوو
ــ چە و کۆڵانەکان دێنێتەوە و رێگەی چەپ و چەوت و
منێ تەنیا… لە سەر دەستم دڵێکی ئارەزووی سووتاو
لە سەر زارم وەلی گۆرانییەک کەس لێمی نەژنەوت و
لەشی شارم لە کۆڵم نا… خوداحافیز دەمی ڕۆژ و
شەوانە ئەو دەمانەی شەو … دەبم هێمن دەگەڵ شەوت و
بڕۆ هەرزەی درۆزن ، بێهونەر، بێ‌عورزە… دەتقیژاند
دەسووتام و بە دەستم فەندەکێک و یەک دەبەی نەوت و…