ڕۆژئاڤا

مەسعوود قەنبەری

.

-(پەرانتز مەوەس..!
نۆقتە مەنە..!
مەچوو وە سەر خەت..!
دنیا هێمان وە ئاخر نەڕەسییە..
-(هەر سنوور، پەرانتزێگە
من، پەرانتزەیل چنگ نانە لە حەڵقم
چەتاڵەیل چنۆک، چاتمەم دانە و هان لە چەپاوم
بەڵام، لە هێنانەێ باپیرم
خاک یانێ هووم و ناوێن و سنوور
ژیان یانێ نان جۊەینە و بەڕۊ و گونووڕ
وە نیشتمان،
دارسان خاوارەێگ بۊ
لە چوار ڕیان پڕ هامشوو تەورەیل
نازشرین دۊەتێگ بۊ
ئڕا گیرسن و موور هاوردن سەر قەورەیل
نیشتمان،
ئاسکو مەسێگ بۊ
دارانۊس لە سینێ کەورەیل
هەڵەت هەڵپانێگ، هەڵەداوان هوونکی ئەورەیل
من پرسیارەیل پاوەنم کردنە:

ئێ زمسانە چەن ساڵانە؟
مەلێ ک لە داوان درج، رەژد کردێە
هێنانەێ لە هەڵفڕین چە توانێد بوود!؟
ماسیلەێ ناو شیشە
لە لەف دەریا و شیپەێ شەتاوەیل شێت،
چە زانێ!؟
-(نۆقتە مەنە..
مەچوو وە سەر خەت..
گاهەس،
ئێ تفەنگ دارانۊس کریاێە
چێیەو وە دارسان
ئێجار، بۊە تەمیرەێگ وە دەس ئۆسا تاێر؛
گاهەس شیرین و فەرهاێ
لە خاو دیرۆکی هزاران ساڵ
سەر هێز دان و لە پاێ بیستۊن
بەزم سۊر گرتن
نۆقتە مەنە..
مەچوو وە سەر خەت..
هێمان، ئاخرین وەڵنگ ئاخرین دار دارسان سزیاێ،
هناس کیشێ
وا و وەهار و واران
هەۊرات گیسەیل دۊەتەیل رۆژئاڤا هاوردنە؛
رۆژئاڤا یانێ وەهار
نۆقتە…سەر خەت.
-کوردستان دجارە پێێا بوود..