چوار کورتەشێعر | ڕێوار ئاودانان
ڕێوار ئاودانان
(ئەڕا گەوراترین ڕۊداو!)
گەوراترین ڕۊداو
هەمۊشە هەرئەوە نییە ک
لە نزیکت قوومیەێد.
جارجارێگ
یەێ لق گوڵ
ک ئەڵ مەوداێ دۊرێگ پشکڤییە و
هەرگز ڕێی دەروەچ چەوەیل ت نازانێ
هەرئەو ئاوەخت گوما‌بۊەسە
ک بوو و بەرامەگەێ ئەفسووناوییێ
ئەڵ کووڵ وا
وەتاو تیەێدن
تا هەبۊنت بگرێدە وەر و
گشت دەرگایل جەهان
وە ڕۊ ت بچەکنێ.
گل‌گلێ
نەناس‌ترینەگەێ دۊەکەت
ئمڕوو بوودنە ناسیارترینەگەێ گیانت و
سادەترین ناوێگ ک ژنەفتۊدن (یا تەنانەت نەژنەفتۊدن)
بوود وە تەنیاترین و
قەشەنگ‌ترین بیانگ ژیاینت.
گەوراترین ڕۊداو
جارجارێگ هەرئەو “ناشۆ”ترینەسە
ک وە ساکاریی وارین وەفرێگ
وەناکاو گرێدەتە باڵووش و
وە وێنەێ تریفەێ مانگ
تیەریکیی دەورگردت لەناو بەێد
تا ڕازناکیی گەردوون و
ئەوین و
ڕاسی
باوەڕ بکەی.
*
(ماسی‌بیین)
هەگ قسە کەید
ژە کۊستان وشەیلت
وەفراو زوڵاڵ ڕێ داگرێ و
دە لاخوار دووڵەیل بێ‌دەنگیی م
چەم تازەێ وەدی تێد.
دزانم ک زەریایل و شازەریایلێگ ترەکیش
لەناو جەهانت هەن
ک هێما نەناسیاێ مەننە
وەک دریژەێ کەو کراسەگەت
یا دریژەێ ملپێچەگەێ فیرووزەییت
وە دەم وا.
هەگ قسە کەید
تەنیا ئاوەختم، ماسی‌بیینە!
*
(دزەڕای)
ئسپێ، هەمیشە وەفر نییە ـــ
گاجاریش نق‌بڕینێکە
خۊن ڕشیاێەێ بێگوناێک، ئەوشاردێیە.
*
(ڤەچەۊ نادیار)
گاڤەخت، ناوێک
ئەسپ ڤەچەۊ نادیارێکە ـــ
زەم و پژارەلت دەرێ
تا ڤڵاتەکەێ ساڕێژ.