سەراوەنۊن

پەریسا جەعفەری

.

لە خەێوا هاتمە؟!

یا خەێوا هاتمە؟!

پائەڵگرم و چم وەرەو بن‌درس خوەم

لە ناو مێژگ ژیانم ژاو خوەمە خوەما؛

لە کوو هاتمە؟

کەێ هاتمە؟

ئڕا هاتمە؟

هە هاتمە؟!

م نهاتمە!

م نهاتمە و بارکووڵەێ نەبۊنم خەمە کووڵا و

ڕەوەنی ڕێگاێ بۊنم بووم…

گ گوما هاتێە لە نادیاری ڕێواری

گاهەس ڕێوارێ نەۊە!

گ ڕێ بتواێ بوو

گ ڕێ گوم بۊە…!

چمە فێر خوەم،

فێر داڵگ و داپیرەیل

فێر ژیان

ژیانێ پڕ لە ژان…

لە قەێ پەل‌پوو شەجەرەناوەێ باوگ و باپیرەیل!

وەلێ تێوڵم تەتیەێ لە هۊچ!

گاهەس ئێ ڕێە وە هەڵە چۊم!

شک و گمانم ناو “شەجەرە”س!

داڵگ و داپیر م “شەجەرە” بەڵەێ نەۊنە!

باێا بچم قەێ پەل‌پوو “دار”ناوەیل بوشکنم

لە مەی داڵگ و داپیرێ گ خەێوا بۊنە!

ڕێ تیەریکێگە

ناهمیێ بوودە تۊشمەو

لە ناوێ ک نیە

لە ناوێ ک گوما هاتێە!

لە دارناوێ ک نیە!

دڵم قوڵ تیەرێ

لە بان قەور ناوێ ک نەمەنی بۊە!

قەور!

ئاگرەکەوڵەو بووم!

لەێ بێ‌دەسڵاتیە، لەێ ڕێ تیەریکە لاگرم؛

وەر ئەو قەورسان…

لە قەێ دارناوەێ زنەی نیشانێ لێان نیە!

گاهەس لە دڵ سان قەورسان…

وەلێ

سەرم سڕ مینێ

تەنانەت

لە دڵ سان قەورسانیش

ناوێان نیە!

تەنانەت مردگەیلیش هە باوگ داشتنە!

نەواێ م نیێم؟!

نەواێ خەێویم؟!

ئاێەمەیل باوگ‌دار!!

چمان قڵا قرنگانگەسە مل سەر ژیان ژنا!

قڵا!

ئڕا دۊر خسن نێسی

دەنگ بەرزو کریا:

قڵا قڵا/ باوگد مرا/ داڵگد مرا/

لە سەر کوچگ/ ڕیقدەو ئڵا…

تەنانەت قڵایش ناوێ لە داڵگێ بۊ!

خوەزێمەو قڵا!

ئەنۊ م ئڕا…؟!

ئاخ لەێ ژیانە

ئافرەتی ژانە!

گ ناویشێ لە دەمچەو زنگانی سڕیاس

هەر ئەوجوورە گ ئاشاسێ لە بەش ژیان!

ئۊشن ژن ژیانە!

ژن ژیا؟ نە!