تەنیا وەرزوو بەرزەخوو… – ئامینە ڕەحیمی / شێعری هەورامی
ئامینە ڕەحیمی (ژوان)
.
تەنیا وەرزوو بەرزەخوو ڕۆحیم
زمسانێوەن
کە ئاتەشگاو هۆمێد٘یشنە
هێزمێ تەڕێ سۆچا
من کە هەناسەم
گوڵاو قاڵیێچ
تنگنێوە و
زەردەخوەمنە
نەخشوو هەزار ئاواییا پێویێ.
کێ زانۆ؟
بنەو هەر برژانگێمنە
چەمەڕایی چن ئەشقا و
سووری لچامنە
حەسرەتوو
چن ماچە ناخافڵام
کەلەمچێ کەردەن
من کە بەژنوو گەردوونیم
جاموو تۆغیانینە دیەن…
بەرزەخوو ڕۆحیمنە زمسانێوەن
و من
کە سلوولێمنە وا گنۆ و
زڵفێم
بەیسێ هەتیمی مازارە
حەوت کەڕەتێ
وەرمم دیەن
دەسی سەوز و
فچەی گەرموو ئاشنایێوە و
ئیسە جا بایەقۆشێو
وێرانەو شێعرەکامنە
پسش دانرە
-ئادیچ وەختەی
تا سەرتیتروو مەرگی
لاپەڕوو ئی شێعرێمە بەینا-.
بەرزەخوو ڕۆحیم زمسانێوەن
بەڵام من
ئیمان نماروو پی وەرزە سەردێ٭
کە چرۆ ئاواتام
دلێ شاخەساروو پەنجەکاتنە
کۆتا ئاردەن
بەیدەسەو تاریکی مەبوو
کە هەزار تلۆعێم
چەماو تۆنە
کۆ کەردێنێوە و
هەر سات
هەستم کەردەنی
پێسەو گرەوەخۆڵێوە
ناقم گێرتەبۆش…
ئیمان نماروو پی وەرزە سەردێ و
سەروو داریشەو
ئەر مەسلووبەنا
ڕۆحی مانیام
عەرووج کەرۆ
بە پاژەرەژوو باڵایت…
یەخبەننانا
بەڵام جامەی
شەرابوو ئامایت
ئاخرین ڕەگوو
دەیموو حەزامنە
جاری و
ژەنەی دڵمنە کەرۆ یۆرێ؛
ئیمان نماروو پی وەرزە سەردێ.
٭ئاماژە بە شێعرەو”ایمان بیاوریم بە آغاز فصل سرد” فرووغ