هیزی عەسر
سابیر عەزیزی
.
ھیزی عەسر
لاملێ وەرتاوەییت
پەیکێوە پەی ملەوانەو زەرێبارێ
و
پیاڵێ خوەییت پەڕێ کەردێ
جە شەرابو خەمزاو نساری
ھیزی عەسر، ھیزی عەسر
درەختوو ماچی تنگیاوەو
بۆوەت مجیا باڵامەرەو
کانگاو لەزەتی
خەسیا…
ھیزی عەسر
تا وێرەگا
ھەر تۆ بێنی
چەمێ چڵێسێم پەی تەماشێت
مڵاسوو قوجنایشا نەبێ
خواو بێزاری خەڵەتیا بێ
ھیزی عەسر، ھیزی عەسر
تا ئا وەختە …
باخچەو وەفێ
چرکە کانە
سەعاتە متش کەردە بێ
وەخت…
ئایزامێرو جوانی عۆمریمەنە
کۆڵنجێ پیری تقنێ
و
ماساژو ھەناسەو بێوەختی دێ
ھیزی عەسر
ئادو ئێدو شمە
نەبێندێ…
حەرتا چەم بێ
گرد چەرمە بێ
ھاوارو گەمەو شادی بێ
نەھاییم بێ و نەھاییت بێ
چی بێنەنە
حەرچی وەیەرد بە تاسە بێ
حەرچی کریا نەگێڵاوە
ھیزی عەسر
حەرچی ھاوارێم بێنێ
کەردێم قۆربانی
لابلاو لاچەمەکات
حەرچی دۆعاو نزا
شکە بەرێنا
دێم کۆڵێ
ماچە جیا مەنەکێ کۆڵمات
ھیزی عەسر
عەشقم
جە وڵەو چەنێوە تەماشە کەرد
وەشەویسیم
جە خوەو(ژوکوند)ێوە ئەشناسا
دەسوودیمم
بە ئاوەو ئازادی گێرت
و
ئەسپو ئیمانیم
چێرو سێوەرەو
درەختوو ئێنسانینە زیینی کەرد
ھیزی عەسر
خوەو ژوکوند، تابلۆخوەو مونالیزا،لئۆناردوداوینچی