دیم سەرد

شێردڵ ئێلپوور

.

ها ناو دیمێ. سەردێیە. بخواریەگە کوشیاسەو. خوەزیا بتوانسیا دەمێ بێیاتا! نیەتوانێ. دەسەیلێ هەمگیر نیین. ساێدانە یەکا و ها کەێد و نەێدانە بن هەنگڵێ. ورسێ زوور داسە لێ. سەرپایە، قەرارێ نیەگرێ. تەم و سەرما لچ نانەسە درانەوە. زقوم پسا سقانەیل دیمەگە شکنێ، قرچ، پوق. دەنگ تێد. دەنگ وا. لۊلەی گورگ. ورسگێیانە. پسای نزیکەوبوون. وا پسا خوەی ساێدە قەی دیوارەگانا و کیفنێ و له شوونێ لۊلەی گورگ گشتێ جەوەڵەگە داگرێ.

    تەنیاس، تەنیای تەنیا لە ناو دیمێ، چووڵ و تەنیا لە ناو جەوەڵێ. دیمەگە سەردە و ناو لە دەیشت سەردتر. تواێ ویرەوبکەێد، ویرێ گردوپڕەو نیەود. سەرما خڵێفەی خوەی دایەسە دەورێیا و تەڵواسە داگرتێیەسەی. لەنوو چەقەیان تێد. نزیکترەو بۊنە. ئەقەورە نزیک ک پووس لەشێ ورسێ بۊنێیان هەست کەێ. دەس له درانەگە هەڵخسنە. دەرەگە ناکەسە، وەرەقەیان نیەگرێ. هەمرەسە ک بانەو ناو.”گورگ ورسێ و پەچیەی کۊەنە”. پایلێ سسەو بۊنە. خوەشێ تێ دانیشێد و بکەێدەو یاد لە ئەوسایل خوەشێ ک زەمانێیانیش فرە کەم بۊ و کوڵ. له ئەوسایلێ ک جارێ‌ تر نیەتوانێ دەسەژی و هەستێیان بکەێ. نیەتوانێ دانیشێد و سەرپایە. هاوارێ دەر قوڕگێ گرتێیە. تواێ بقیڕنێد و دەنگێ بەرزەو نیەود. هاز نەیرێ. دەنگ هەسە هەس گورگەگان، دڵێ له بانا داخورومێد. لۊت نانەسە درانەگەوە. چنگیڕ له ئاخر وەرەقەیل دەرەگە خەن. کڕەی چنگیڕێیان له ناو سەرێ هەره کەێ. سەر خوەی گرێدە مشت و هاوار کەێ. له دەنگ هاوار خوەی گازڕانەگە له سەرێ پەڕێد و ها ناو ماشینێ. ماشینەگە وسیایە گوای رووشنە. دەورێ تەمه، نیەزانێ ها کوورە. تا ئەورە ک چەو کار کەێ وەفرە ک وڵات پووشانێیە. چەویلێ هەنا نیەکەن. تەمە و دەنگ لۊلەی گورگ. هێمان خاس نیەزانێ ها کووره، مردێیه یا زینێ؟ یا له ئێرە چه کەێ؟ یا ئیە ماشینگەی خوەیانە یا…؟

     چۊ هاتێیەسە ئێرە، ئێ بێاوان ئەرق بەرقە وە تەنیا لە ناو ماشینێ؟ نەکەێ هەم گازڕان بوود! دەێ لە لای دەم خوەی، سەردی دەسێ له دەمچەوێ مینێدە جی و شیشەی ماشینەگە  کیشێدە خوار، گوڵمووڵەێ سەرما دەێ له ناو سەروچەوێ و وە گورجێ شیشەگە دەێدەو بان و دەرەگە چەکنێ. خوارێ وەزەنه. لۊلەێ گورگ تێ له دۊر، چمان ئێسه دی تێرن. دەرەگە بەسێد.

له لا شفوڕەگەوە تێدە خوار، تا دەرەگە چەکنێ؛ کڵافێ تەم و مژ و سەرما دەێ له ناو دەمچەوێ. پا نەێدە زەۊ. ژێر پاێ رچگیاسە و خرچەێ تێد. جادە دیار نییە. تا ئەورە ک چەو کار کەێ یەخ و وەفرە و تەم داگرتێەسەی. ئیسفای زەۊەگە گرێ؛ گوڵوم گوڵوم خۊن رشیایە و رچ بەساس. له پای ماشینەگە تا ناو دووڵەگەی شاندەسێ، گوڵە گوڵە و تک تک. زەنجیر چەرخەگان له پای تایر ماشینەگە کەفتنە، شوون پای گەلێگ گورگ، لۊلنن له دۊر. چمان پسای لێ خوەن. 

داخم یەی تەنیاس؟ ئەرێ؟! نە نەکەێ هەم وازوەرەس. سەردێ بوود، دانیشێدە ناو ماشینەگە. نە تەنیا نەبۊە، کەسێ گەردێ بۊە، بێ‌گومان بۊە؛ کەسێ بۊە گوای ئیسە تەنیاس. کی هاوردێیەسەی ئێرە؟ یەی له لا شاگرد ماشینەگه بۊ؛ ماشینەگە گوای کی هاوردێیەسەی ئێرە؟ یەی ک شفووڕی نیەزانێ، بەرجد کەسێ وەلێیا بۊه. تەنیا نەبۊە…. گورگێ له نوای ماشینەگە لۊلنێ. دەنگ موبایلێ له جیەگە هەڵزڕنێدەی. ئاو و ئەرەقێ یەکەو گرێد. چەوەیلێ زڕواقه داسە و گورگێ ها له وەرایوەرێ. له خووف واشیات سفت چەویلێ نۊقنێد و دەسەیلێ فڕە دەێ ک…. دو دەس وە نەرامێگەو له بان تەختەگە هڵاژننەێ. داژگارەگەیە ک ئیە سێ ساڵ ئازگاره لەی تەنیایی خووفناکە وە دادێ ڕەسێد و سەویریێ دەێ.

“خوەزیا بخواردانەم. ئێ دیمە پسا پۊنگ پۊنگ له بناخا جاێدەمەو”. گیرێد. داژگاره‌گه‌ چێیه‌. دیمه‌گه‌ هه‌م سه‌رده‌ و…